Lista- og hugsjónamaðurinn Tolli Morthens lenti í dag í Argentínu ásamt ferðafélaga sínum Arnari Haukssyni en þar hyggjast þeir klífa fjallið Aconcagua sem liggur upp við landamæri Chile. Fjallið er hæsta fjall Suður Ameríku og í raun hæst allra fjalla utan fjallanna í Asíu. Fjallið er hluti af Andes fjöllunum og rís hæst í 6961 metra.

LEIÐANGUR TIL BETRI LÍFS

Leiðangurinn er farinn til að vekja athygli á starfsemi Batahúss sem tók til starfa á síðasta ári og um leið safna áheitum fyrir starfsemina. Batahús er einstaklingsmiðað bataúrræði við enda afplánunar þar sem einstaklingum er boðin heimilisaðstaða til allt að tveggja ára eða eftir atvikum til skemmri tíma. Unnið er með einstaklingum á jafningjagrundvelli út frá hugmyndum um áfallamiðaða nálgun. Báðir eru Tolli og Arnar í stjórn Batahúss.

“Þetta verður fyrir mig, mikil bata og sáttar ganga, en við tileinkum gönguna Batahúsinu og þá er meiningin að safna pening með áheitum í Sollu-sjóðinn sem styður við starfsemi hússins.” Sagði Tolli í nýársfærslu sinni á Facebook. “Fyrir utan ýmsa eðlilega fyrirvara á svona fjallgöngu þá er óvissan gríðarleg með það hvert Covid faraldurinn fer með þetta. Falla flug niður, lokast landamæri eða veikjast menn í búðum á fjallinu og fleira í þeim dúr. Við eru staðráðnir í að leggja inn fyrir góðu ári.”

Tolla eru áramótin og nýárið ofarlega í huga því hann byrjar færsluna á því að segja að það sé áratuga hefð hjá honum að labba á fjall á Nýársdag meðal annars til að standa með víðsýni fyrir framan. “Þarna mitt á milli þessara fleka fortíðar og framtíðar stingur núvitundin upp kollinum eins og lítið ljós sem með árunum hefur orðið sterkara og bjartara eftir því sem maður æfir hana oftar og hjálpar manni með skilning og sátt í að skilja allt það sem hefur hrúgast upp í kjölfari manns á langri leið.”